Ֆրանկոֆոնիայի շրջանակներում Ղազախստանում կազմակերպվող միջոցառումներին Հայաստանի դեսպանության մասնակցության մասին

08 ապրիլի, 2025

2025թ․ ապրիլի 8-ին Ղազախստանում Հայաստանի դեսպան Արմեն Ղևոնդյանը մասնակցել է «Ֆրանկոֆոն գարնան» 15-րդ շրջանի բացմանը նվիրված մամլո ասուլիսին։

Ղազախստանի Հանրապետության նախագահին առընթեր Կենտրոնական հաղորդակցման ծառայության հարթակում՝ Հայաստանի, Բելգիայի, Լատվիայի, Լիտվայի, Ռումինիայի, Ֆրանսիայի և Շվեյցարիայի դեսպանությունների մասնակցությամբ կազմակերպված ասուլիսին դեսպան Ա․Ղևոնդյանն ընդգծել է նմանօրինակ միջոցառումների անցկացման կարևորությունը, որոնք կոչված են միավորել երկրներն ու ժողովուրդները ֆրանսերեն լեզվի և մշակութային բազմազանության առաջմղման, կրթության և վերապատրաստման խթանման, մշակույթների և քաղաքակրթությունների երկխոսության ակտիվացման, ինչպես նաև համերաշխության ամրապնդման շուրջ։ Իր խոսքում Հայաստանի դիվանագիտական առաքելության ղեկավարը նաև ներկայացրել է Ֆրանկոֆոնիայի միջազգային կազմակերպության շրջանակներում Հայաստանի ջանքերն, ինչպես նաև 2027թ․ հուլիսի 23-ից օգոստոսի 1-ը Հայաստանում նախատեսված Ֆրանկոֆոնիայի Տասներորդ մարզական և մշակութային խաղերի նախապատրաստման ընթացքը։

Անդրադառնալով Ղազախստանում «Ֆրանկոֆոն գարնան» 15-րդ շրջանին, որով նախատեսված է լայն ծրագիր, Հայաստանի դեսպանը նշել է, որ ընթացիկ տարում Ղազախստանի չորս քաղաքներում՝ Աստանա, Ալմաթիում, Կարագանդայում և Շիմքենտում կկազմակերպվի հայ ռեժիսոր Սերժ Ավեդիկյանի «Նա, ում սպասում էին» ֆիլմի ցուցադրությունը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր