համաժողով՝ «Միջուկային զենքից զերծ աշխարհի կառուցումը» - Ղազախստանում Հայաստանի դեսպանություն

Ղազախստանում Հայաստանի դեսպանություն

համաժողով՝ «Միջուկային զենքից զերծ աշխարհի կառուցումը»

29 օգոստոսի, 2016

Ս.թ. օգոստոսի 29-ին Ղազախստանի մայրաքաղաք Աստանայի Անկախության պալատում տեղի ունեցավ միջազգային համաժողով՝ «Միջուկային զենքից զերծ աշխարհի կառուցումը» թեմայով: Համաժողովին մասնակցում էին քաղաքական գործիչներ, ոչ կառավարական կազմակերպությունների ղեկավարներ, գիտնականներ աշխարհի 50-ից ավելի երկրներից:

Համաժողովին ծրագրային ելույթով հանդես եկավ ՂՀ Նախագահ Ն.Նազարբաևը, որը ընդգծեց 25 տարի առաջ Սեմիպալատինսկում միջուկային փորձարկումները դադարեցնելու մասին Ղազախստանի ընդունած որոշման պատմական նշանակությունը: Նա նշեց, որ Ղազախստանը կամովին հրաժարվեց աղետաբեր ժառանգությունից, սակայն նրա այդ քայլին ոչ մի այլ միջուկային պետություն չհետևեց: ՂՀ Նախագահը վճռականություն հայտնեց շարունակելու ջանքերը՝ ոչ միայն միջուկային փորձարկումներն իսպառ բացառելու, այլև մոլորակի վրա կուտակված միջուկային զինանոցը վերացնելու ուղղութամբ:

Համաժողովի առաջին նիստում, որը վարում էր ՂՀ արտգործնախարար Ե.Իդրիսովը, ելույթով հանդես եկավ ՀՀ Ազգային ժողովի արտաքին հարաբերությունների մշտական հանձնաժողովի նախագահ Արտակ Զաքարյանը: Նա իր ելույթի առանցքային թեմա էր դարձրել «պատերա՞զմ, թե՞ անվտանգություն առանց միջուկային զենքի» երկընտրանքի քննությունը:

«Միջուկային զենքից զերծ աշխարհի կառուցումը» միջազգային համաժողովին մասնակցելու նպատակով Աստանայում գտնվող ՀՀ Ազգային ժողովի արտաքին հարաբերությունների հանձնաժողովի նախագահ Արտակ Զաքարյանին ընդունեց Ղազախստանի Խորհրդարանի Մաժիլիսի փոխնախագահ Վլադիմիր Բոժկոն:

Ողջունելով հայ գործընկերոջը և շնորհակալություն հայտնելով համաժողովին մասնակցելու համար՝ Վ.Բոժկոն ներկայացրեց նորընտիր Մաժիլիսի կառուցվածքը, օրենսդրական գործունեության հիմնական ուղղությունները, միջխորհրդարանական համագործակցության առաջնահերթությունները: ՂՀ Մաժիլիսի փոխնախագահը հատուկ անդրադարձ կատարեց հայ-ղազախական միջպետական հարաբերությունների ներկա վիճակին, գոհունակությամբ ընդգծեց դրանց բարեկամական, դաշնակցային բնույթը և հույս հայտնեց, որ, չնայած համաշխարհային տնտեսական ճգնաժամի հարուցած դժվարություններին, երկկողմ տնտեսական կապերը ընդարձակվելու ներուժ ունեն:

ՀՀ ԱԺ արտաքին հարաբերությունների հանձնաժողովի նախագահ Ա.Զաքարյանը շնորհակալություն հայտնելով ջերմ ընդունելության համար՝ ներկայացրեց ՀՀ արտաքին քաղաքականության գլխավոր առաջնահերթությունները, ԼՂ հակամարտության քաղաքական կարգավորման ընթացքը, ընդգծեց հայ-ղազախական հարաբերությունների խորհրդարանական բաղադրիչը զարգացնելու, մասնավորապես՝ երկու երկրների խորհրդարաններում գործող բարեկամության խմբերի միջև կապերն աշխուժացնելու և արտաքին հարաբերությունների հանձնաժողովների միջև համագործակցության հուշագիր ստորագրելու կարևորությունը: Ա.Զաքարյանը և Վ.Բոժկոն հանդես եկան իրենց երկրների խորհրդարաններում ստեղծված բարեկամության խմբի փոխայցելություն կազմակերպելու առաջարկներով:

Հանդիպմանը ներկա էին ՂՀ Խորհրդարանի Մաժիլիսի միջազգային կապերի, պաշտպանության և անվտանգության հարցերով կոմիտեի քարտուղար Իրինա Արոնովան, հայ-ղազախական բարեկամության խմբի նախագահ Բեյբըթ Մամրաևը, Մաժիլիսի պատգամավոր Նարինե Միքայելյանը, ինչպես նաև Ղազախստանում Հայաստանի դեսպան Արա Սահակյանը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր