Նուր-Սուլթանում տեղի ունեցավ բարեխոսական կարգ՝ ի հիշատակ Հայերի ցեղասպանության Սուրբ նահատակների

24 ապրիլի, 2021

Ապրիլի 24-ին Ղազախստանի մայրաքաղաք Նուր-Սուլթանում՝ ռուս ուղղափառ եկեղեցուն պատկանող Սուրբ Ուսպենյան տաճարում տեղի ունեցավ բարեխոսական կարգ` ի հիշատակ Հայերի ցեղասպանության Սուրբ նահատակների: Կարգն անցկացվեց Նուր-Սուլթանի եկեղեցական շրջանի ղեկավար, Ծայրագույն վարդապետ Սերգի Կարամիշևի (Сергий Карамышев) կողմից:

Արարողությանը մասնակցում էին Ղազախստանում ՀՀ դեսպանության դեսպանորդ, գործերի ժամանակավոր հավատարմատար Արթուր Մանասերյանը, դեսպանության անձնակազմը և հայ համայնքի ներկայացուցիչները:

Ա.Մանասերյանն իր ելույթում ներկայացրեց ցեղասպանության 106-րդ տարելիցի օրվա խորհուրդը և ընդգծեց, որ հայ ժողովուրդը զրկվել է իր բնօրրանից, իսկ Հայերի ցեղասպանության իրականացման համար պատասխանատու կողմը շարունակում է ժխտել փաստը։ Հանցագործի անպատժելիությունը խրախուսում է նաև Ադրբեջանին շարունակել իր ցեղասպան քաղաքականությունը և ատելության քարոզը հայ ժողովրդի հանդեպ։

ՀՀ դեսպանորդը շնորհակալություն հայտնեց Ս.Կարամիշևին ռուս ուղղափառ եկեղեցու տարածքում հարգանքի տուրք մատուցելու հնարավորությունն ավանդաբար ստեղծելու և եղբայրական եկեղեցու ցուցաբերած համերաշխության համար:

Այնուհետև ՀՀ դեսպանորդը ծաղկեպսակ զետեղեց տաճարի տարածքում գտնվող հայկական խաչքարին՝ հարգանքի տուրք մատուցելով Սուրբ նահատակների հիշատակին:

Ղազախստանի մյուս հայ համայնքների, այդ թվում՝ Ալմաթի քաղաքի, Ակտոբեի, Մանգիստաուի, Պավլոդարի, Ատիրաուի, Արևելաղազախստանյան մարզերի ներկայացուցիչները ևս, հնարավորության դեպքում, հաշվի առնելով և պահպանելով երկրում հայտարարված կարանտինային ռեժիմի սահմանափակումները, հարգանքի տուրք մատուցեցին Հայերի ցեղասպանության սրբադասված նահատակների հիշատակին:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր