Ղրղզստանում Հայաստանի պատվավոր հյուպատոսության հանդիսավոր բացման վերաբերյալ

10 դեկտեմբերի, 2024

2024թ․ դեկտեմբերի 10-ին կայացել է Ղրղզական Հանրապետությունում Հայաստանի Հանրապետության պատվավոր հյուպատոսության հանդիսավոր բացումը։

Բացման արարողությանը մասնակցել են Ղրղզական Հանրապետության արտաքին գործերի նախարարության ներկայացուցիչները, Ղրղզստանում հավատարմագրված օտարերկրյա պետությունների դիվանագիտական առաքելությունների և հյուպատոսական հիմնարկների ղեկավարները, Բիշկեկում գործող Պատվավոր հյուպատոսների ակումբի անդամներն, ինչպես նաև Ղրղզստանի գործարար շրջանակների և հայ համայնքի ներկայացուցիչները։

Ղրղզստանում Հայաստանի դեսպան (նստավայրը՝ Աստանա) Ա․Ղևոնդյանն իր բացման խոսքում ընդգծել է, որ պատվավոր հյուպատոսության հիմնումն ևս մեկ անգամ վերահաստատում է Հայաստանի պատրաստակամությունը՝ Ղրղզստանի հետ համակարգային հիմքի վրա՝ երկու երկրների ժողովուրդների միջև բարեկամության և փոխըմբռնման ոգով հարաբերությունների հետագա կառուցման հարցում։ Շնորհավորելով Ա․Վանյանին՝ պատվավոր հյուպատոսի պատասխանատվությունը ստանձնելու կապակցությամբ, դեսպան Ա․Ղևոնդյանը հույս է հայտնել առ այն, որ հյուպատոսության գործունեությունը մոտ ապագայում կդրսևորվի գործնական արդյունքներով՝ փոխշահավետ առևտրատնտեսական և մշակութային-հումանիտար գրավիչ նախագծերի իրականացման աջակցության շեշտադրմամբ։

Իր հերթին՝ Ղրղզական Հանրապետության արտաքին գործերի նախարարության հյուպատոսական դեպարտամենտի տնօրեն Ս․Ժումակադիրը նշել է, որ պատվավոր հյուպատոսության հիմնադրումը ամրապնդում է ներկայումս Հայաստանի և Ղրղզստանի միջև մի շարք ուղղություններով դիտվող՝ փոխհարաբերությունների աշխուժացումը։

Երախտագիտություն հայտնելով վստահության համար՝ պատվավոր հյուպատոս Ա․Վանյանը ընդգծել է երկկողմ համագործակցության զարգացմանն աջակցելու մասով իր պատրաստակամությունը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր