Հանդիպում «Kazakhstan Temir Zholy»-ում

29 հունիսի, 2023

Ս․թ․ հունիսի 29-ին կայացել է Ղազախստանում Հայաստանի դեսպան Արմեն Ղևոնդյանի հանդիպումը «Қазақстан темір жолы» /Kazakhstan Temir Zholy/ Ազգային ընկերություն» ԲԸ նախագահության ղեկավար Նուրլան Սաուրանբաևի հետ։

Տրանսպորտի ոլորտում, ինչպես նաև Հայաստանի և Ղազախստանի տարանցիկ ներուժի աճին միտված երկկողմ համագործակցության ընդլայնման հեռանկարների համատեքստում Ն․Սաուրանբաևը ներկայացրել է «Қазақстан темір жолы»-ի մոտեցումները, որոնք միտված են բեռների արագ ձևակերպման, մաքսային հայտարարագրման և սակագնագոյացման գործընթացների լավարկմանը և կիրառելի են նաև Ղազախստան-Թուրքմենստան-Իրան երկաթուղու երկայնքով իրականացվող կոնտեյներային փոխադրումների պարագայում:

Իր հերթին՝ դեսպան Ա․Ղևոնդյանը ներկայացրել է ՀՀ, ՌԴ և ԱՀ փոխվարչապետների համատեղ համանախագահությամբ գործող՝ տրանսպորտային և տնտեսական կոմունիկացիաների ապաշրջափակման հարցերով Աշխատանքային խմբի շրջանակներում բանակցությունների ընթացքը, որոնց շրջանակներում ընդհանուր ընկալում է ձեռք բերվել Երասխ-Ջուլֆա-Մեղրի-Հորադիզ երկաթուղու վերականգնման և վերջինիս շահագործման կազմակերպմանն ուղղված քայլերի հերթականության մասով։ Բացի այդ, ներկայացվել է նաև հայաստանյան կողմի մտադրությունը՝ մոտալուտ ժամանակներս ավարտել Մարգարա անցակետի ենթակառուցվածքի արդիականացման աշխատանքները, որի շահագործման հնարավորությունը դիտարկվում է երրորդ պետությունների քաղաքացիների և դիվանագիտական անձնագրեր կրողների համար՝ Հայաստանի և Թուրքիայի միջև հարաբերությունների կարգավորման հարցերով բանակցային ձևաչափում ձեռք բերված պայմանավորվածությունների շրջանակներում։

Հանդիպման արդյունքներով երկուստեք վերահաստատվել է երկկողմ տնտեսական փոխգործակցության համատեքստում շահագործվող երկաթուղային երթուղիների դիվերսիֆիկացմանն ու պահանջարկ ունեցող հեռանկարային կապուղիների մասով առաջարկների մշակմանը նպաստող քննարկումները շարունակելու վերաբերյալ պատրաստակամությունը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր