Ղազախստանում Հայաստանի մշակույթի օրեր

15 հոկտեմբերի, 2024

2024թ․ հոկտեմբերի 15-ին Հայաստանի Հանրապետության նախագահ Վահագն Խաչատուրյանը և Ղազախստանի Հանրապետության նախագահ Կ․Տոկաևը համատեղ այցելել են Հայաստանի մշակույթի օրերի կապակցությամբ Կալիբեկ Կուանիշբաևի անվան ղազախական ազգային երաժշտական-դրամատիկական թատրոնում կազմակերպված հանդիսավոր համերգը։

Միջոցառման մեկնարկին ընդառաջ նախագահները ծանոթացել են մեծն հայ կինոռեժիսոր և նկարիչ Սերգեյ Փարաջանովի 100-ամյակին նվիրված՝ թատրոնի ճեմասրահում բացված լուսանկարների ցուցահանդեսին:

Ողջույնի խոսքում Հայաստանի Հանրապետության կրթության, գիտության, մշակույթի և սպորտի նախարար Ժաննա Անդրեասյանն ընդգծել է, որ Ղազախստանում Հայաստանի Մշակույթի օրերի ծրագիրը ձևավորվել է մշակույթի անհաղթ միավորող ուժն իրենց կյանքով և արվեստով ապացուցած՝ համաշխարհային ճանաչում ունեցող արվեստի հայ գործիչների ստեղծագործական ժառանգության հիման վրա։ Նախարար Ժ․Անդրեասյանը նաև վստահություն է հայտնել, որ հայ-ղազախստանյան մշակութային-հումանիտար փոխգործակցությունը կհարստանա նոր դրսևորումներով և ձևաչափերով։

Ղազախստանի Հանրապետության մշակույթի և տեղեկատվության նախարար Աիդա Բալաևան նշել է, որ նմանօրինակ միջոցառումները ոչ միայն հնարավորություն են ընձեռում մեծարել «եղբայրական Հայաստանի մեծ և հինավուրց արվեստն», այլ նաև հանդիսանում են երկու երկրների և ժողովուրդների միջև գործընկերական հարաբերությունների գրավականը։

Համերգի ընթացքում հնչել են աշխարհահռչակ Կոմիտասի, Շառլ Ազնավուրի, Ժորժ Գարվարենցի և Առնո Բաբաջանյանի ստեղծագործությունները՝ Հայաստանի Պետական ջազային նվագախմբի՝ Դավիթ Մելքոնյանի ղեկավարության ներքո, ինչպես նաև արվեստի վարպետներ Ինգա Արշակյանի և Գոռ Սուջյանի կատարմամբ։

Ղազախստանում Հայաստանի մշակույթի օրերի անցկացման շրջանակներում կանցնեն նաև Հայկական կինոյի օրերը։ Իսկ Սոս Սարգսյանի անվան Հայաստանի պետական «Համազգային» թատրոնը (գեղարվեստական ղեկավար՝ Նարինե Գրիգորյան) Աստանայի բնակիչներին կներկայացնի «Լյու-Բոֆ» ներկայացումը, որի հիմքում Դանիիլ Հարմսի ստեղծագործություններն են։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր