Հայաստանի նախագահը ծանոթացել է «Astana Hub»-ի գործունեությանը

17 հոկտեմբերի, 2024

2024թ․ հոկտեմբերի 16-ին՝ Ղազախստանի Հանրապետություն պաշտոնական այցի շրջանակներում, Հայաստանի Հանրապետության նախագահ Վահագն Խաչատուրյանն այցելել է ՏՏ-սթարթափների «Astana Hub» Միջազգային տեխնոպարկ։

Այցելության ընթացքում Ղազախստանի թվային զարգացման, նորարարությունների և օդատիեզերական արդյունաբերության նախարար Ժասլան Մադիևը Հայաստանի նախագահին է ներկայացրել Astana Hub տեխնոպարկի թվային ենթակառուցվածքը, որը ներկայումս միավորում է շուրջ 1500 ՏՏ ընկերություն, այդ թվում՝ մի շարք հայաստանյան։ Նախագահ Վ․Խաչատուրյանին է ներկայացվել նաև Աստանայում Արհեստական բանականության ազգային կենտրոնի հիմնադրման ծրագիրը, որի շրջանակներում միջին և ավագ դասարանների աշակերտների համար կհիմնադրվի ստեղծարար տեխնոլոգիաների և արհեստական բանականության դպրոց։ Որպես նշյալ դպրոցի ստեղծման ռազմավարական գործընկեր ընտրվել է Tumo Ventures-ը։

Տեխնոպարկի այցելության արդյունքներով, նախագահ Վ․Խաչատուրյանի ներկայությամբ, Tumo Ventures-ի գլխավոր տնօրեն Բեկուր Փափազյանն ու Astana Hub-ի գլխավոր տնօրեն Մագժան Մադիևը ստորագրել են համագործակցության հուշագիր, համաձայն որի նախատեսվում է TUMO ստեղծարար տեխնոլոգիաների դպրոցի հիմնադրում՝ Արհեստական բանականության ազգային կենտրոնի հենքի վրա։

ՏՏ-սթարթափների «Astana Hub» Միջազգային տեխնոպարկը Կենտրոնական Ասիայում խոշորագույն տեխնոպարկն է, որի գործունեությունն ուղղված է ՏՏ-գործարարության աջակցման էկոհամակարգի ձևավորմանը, ՏՏ տաղանդների վերհանմանն ու սթարթափ նախագծերի զարգացմանը։ Astana Hub-ի մասնակիցները վայելում են արտոնությունների և հնարավորությունների լայն շրջանակ, ներառյալ բիզնեսի մասշտաբավորման ծրագրեր, հարկային և մուտքի արտոնագրերի մասով արտոնություններ, մուտք դեպի կրթական ռեսուրսներ և ժամանակակից ենթակառուցվածք։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր