ՀԱՅ ԴԻՎԱՆԱԳԵՏՆԵՐԸ ՀՅՈՒՐԸՆԿԱԼՎԵՑԻՆ ԱՍՏԱՆԱՅԻ ԵՎ ԿՈԿՉԵՏԱՈՒԻ ՀԱՅԿԱԿԱՆ ԿԻՐԱԿՆՕՐՅԱ ԴՊՐՈՑՆԵՐՈՒՄ

03 սեպտեմբերի, 2018

Նոր ուսումնական տարվա մեկնարկի կապակցությամբ սեպտեմբերի 2-ին Ղազախստանում Հայաստանի դեսպանության անձնակազմն այցելեց հայկական կիրակնօրյա դպրոցներ` ջերմորեն շնորհավորելով գիտելիքի օրվա առթիվ և նվերներ բաժանելով հայ սաներին:
Դեսպան Արա Սահակյանն այցելեց Ղազախստանի մայրաքաղաքից մոտ 300 կմ հեռավորության վրա գտնվող Կոկչետաու քաղաքի բարեկամության պալատում գործող հայկական կիրակնօրյա դպրոց` բաց դաս անցկացնելով երեխաների համար: Դեսպանն ընդգծեց դպրոցի և ընտանիքի դերը հայապահպանության գործում և հորդորեց ծնողներին երեխաների հետ շփվել միայն հայերեն:
Կոկչետաուի «Բարի» հայկական մշակութային միության նախագահ Նորիկ Մագլամյանը, հայերենի ուսուցչուհի Ռուզաննա Դեղյանը, ներկա բազմաթիվ մեր հայրենակիցներ գոհունակությամբ ընդգծեցին Հայաստանի դեսպանության մշտական ուշադրությունը կիրակնօրյա դպրոցի սաների հանդեպ:
Ղազախստանում Հայաստանի հյուպատոս Գոռ Եդիգարյանը հյուրընկալվեց Աստանայի հայկական կիրակնօրյա դպրոցում` բաց դասի ընթացքում տարբեր տարիքի սաներին ներկայացնելով Հայաստանի պատմությունն ու աշխարհագրությունը:
Աստանայի «Վան» հայկական մշակութային միության նախագահ Սահակ Սալումյանը, հայերենի ուսուցչուհի Հայաստան Մնեյանը նշեցին հայ դիվանագետների` ավանդական դարձած և կանոնավոր այցելությունները կիրակնօրյա դպրոց, որոնց ընթացքում հայ մանուկները Մայր հայրենիքի հետ հաղորդակցության նոր լիցք են ստանում:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր