Հանդիպում Ղազախստանի արտաքին քաղաքական գերատեսչության ղեկավարի տեղակալի հետ

15 նոյեմբերի, 2022

Ս.թ. նոյեմբերի 15-ին կայացել է Ղազախստանում Հայաստանի դեսպան Արմեն Ղևոնդյանի հանդիպումը Ղազախստանի Հանրապետության արտաքին գործերի նախարարի նորանշանակ առաջին տեղակալ Կայրատ Ումարովի հետ:

Հանդիպմանը քննարկվել են երկու երկրների արտաքին քաղաքական գերատեսչությունների միջև մի շարք ուղղություններով համագործակցությանն առնչվող հարցեր, այդ թվում՝ բազմակողմ հարթակներում հայ-ղազախստանյան փոխգործակցության առաջմղման հեռանկարները: Երկուստեք վերահաստատվել է Հայաստանի Հանրապետության և Ղազախստանի Հանրապետության արտաքին գործերի նախարարությունների միջև 2022 – 2023 թվականների խորհրդատվությունների ծրագրի դրույթների կատարման պատրաստակամությունը:

Դեսպան Ա.Ղևոնդյանը ներկայացրել է տարածաշրջանում իրավիճակը, Լեռնային Ղարաբաղում 44-օրյա պատերազմի, ինչպես նաև Հայաստանի տարածքային ամբողջականության և ինքնիշխանության նկատմամբ Ադրբեջանի կողմից սանձազերծած ագրեսիայի հետևանքով առաջացած անվտանգային և հումանիտար խնդիրները: ԱԳ նախարարի առաջին տեղակալ Կ.Ումարովի ուշադրությանն է ներկայացվել Հայաստանի և Ադրբեջանի միջև հարաբերությունների, ինչպես նաև Լեռնային Ղարաբաղի հակամարտության կարգավորման առնչությամբ Հայաստանյան կողմի դիրքորոշումը: Ագրեսիայի նոր դրսևորումների կանխման համատեքստում ընդգծվել է կրակի դադարեցման խախտումներին հասցեական արձագանքման կարևորությունը, ինչպես նաև համապատասխան մասնագիտացած կառույցների կողմից ավելի լայն ներգրավվածությունը առկա մարտահրավերների վերհանման ու հակազդման հարցերում:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր