Հավատարմագրերի պատճենների հանձնման մասին

27 մարտի, 2023

Ս.թ․ մարտի 27-ին Բիշքեկում Ղրղզական Հանրապետությունում Հայաստանի Հանրապետության նորանշանակ դեսպան Արմեն Ղևոնդյանը (նստավայրը՝ ք․Աստանա) հավատարմագրերի պատճեններն է հանձնել Ղրղզական Հանրապետության Արտաքին գործերի նախարարի տեղակալ Ալմազ Իմանգազիևին։

Հավատարմագրերի պատճենի հանձնման արարողությանը հաջորդած զրույցի ընթացքում դիտարկվել է հայ-ղրղզստանյան քաղաքական երկխոսության և առևտրատնտեսական հարաբերությունների հետագա առաջմղմանն, ինչպես նաև իրավապայմանագրային հենքի ընդլայնմանն ու մշակութային և հումանիտար նախագծերի իրականացմանը միտված հարցերի լայն շրջանակ։

Ընթացիկ տարում Հայաստանի և Ղրղզստանի միջև դիվանագիտական հարաբերությունների հաստատման 30-ամյակի համատեքստում մտքեր են փոխանակվել երկկողմ փոխգործակցության ներկա վիճակի և զարգացման հեռանկարների շուրջ, ինչպես նաև վերջինիս՝ բազմակողմ կառույցների և տարածաշրջանային միավորումների շրջանակներում գործընկերության դրսևորումների միջոցով հարստացնելու վերաբերյալ։ Հայաստանի դեսպանն ընդգծել է ժողովուրդների բարեկամության, ինչպես նաև 2002թ․ ապրիլի 4-ի Հայաստանի և Ղրղզստանի միջև բարեկամության և համագործակցության մասին Մեծ Պայմանագրով ամրագրված՝ ինքնիշխանության և անկախության փոխադարձ հարգանքի և այլ սկզբունքների վրա խարսխված միջպետական հարաբերությունների ներուժի իրագործման մասով ջանքեր գործադրելու պատրաստականությունը։

Դիտարկվել է երկկողմ միջպետական համագործակցության մեխանիզմների ներքո շփումների ժամանակացույցը։ Տարածաշրջանային օրակարգի հարցերի քննարկման շրջանակներում ՀՀ դեսպանը ներկայացրել է տարածաշրջանում խաղաղությանն ու կայունությանը միտված Հայաստանի ջանքերին հակառակ ադրբեջանական կողմի 2020թ․ նոյեմբերի 9-ի եռակողմ հայտարարության դրույթների խախտումները, Բաքվի առավելապաշտական նկրտումներն ու շարունակական սադրանքներն, ինչպես նաև Լաչինի միջանցքի արգելափակման հետևանքով Լեռնային Ղարաբաղում ստեղծված հումանիտար իրավիճակը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր