Բիշքեկում կայացած հանդիպումների մասին

29 մարտի, 2023

Ս․թ․ մարտի 29-ին Ղրղզական Հանրապետությունում Հայաստանի Հանրապետության արտակարգ և լիազոր դեսպան Արմեն Ղևոնդյանը մի շարք հանդիպումներ է անցկացրել Ղրղզստանի արտաքին քաղաքական գերատեսչությունում։

Արտաքին գործերի նախարարության Երրորդ քաղաքական դեպարտամենտի տնօրեն Բակիտ Ջուսուպովի հետ կայացած հանդիպմանը հանգամանալից դիտարկվել են երկկողմ օրակարգային հարցեր՝ Հայաստանի և Ղրղզստանի միջև միջպետական հարաբերությունների հետագա զարգացման հեռանկարների շեշտադրմամբ։ Երկուստեք արձանագրվել է, որ 2004թ․ Բարեկամության և համագործակցության հայ-ղրղզստանյան պայմանագրով ամրագրված սկզբունքները ամուր հիմք են հանդիսանում համագործակցության ներուժի գործարկման համար ինչպես երկկողմ տիրույթում, այնպես էլ բազմակողմ ձևաչափում։

ՄԱԿ հարթակներում և միջազգային ու տարածաշրջանային կառույցներում Հայաստանի և Ղրղզստանի փոխգործակցությանն առնչվող հարցերը քննարկվել են Միջազգային կազմակերպությունների դեպարտամենտի տնօրենի պ․կ․ Ուլան Դանիարովի հետ։ Ընդգծվել է փոխադարձ հետաքրքրություն ներկայացնող հարցերի շուրջ հետագա փոխգործակցության ակտիվացման՝ ներառյալ համապատասխան միջԱԳՆական խորհրդատվությունների անցկացման միջոցով, պահանջվածությունը։ Տարածաշրջանային մի շարք զարգացումների շուրջ մտքերի փոխանակման համատեքստում դեսպան Ա․Ղևոնդյանը ներկայացրել է Լեռնային Ղարաբաղի և Հայաստանի նկատմամբ ադրբեջանական ագրեսիայի արդյունքում ստեղծված իրավիճակն ու Ադրբեջանի կողմից Լաչինի միջանցքի ապօրինի արգելափակման արդյունքում ստեղծված հումանիտար ճգնաժամի հետևանքները։ Միևնույն ժամանակ նշվել է, որ Ադրբեջանը շարունակում է անտեսել պարտադիր կատարման ենթակա ՄԱԿ միջազգային դատարանի ս․թ․ փետրվարի 22-ի որոշումը։

Ղրղզստանում Թուրքմենստանի դեսպան, դուայեն Շադուրդի Մերեդովի հետ կայացած հանդիպման ընթացքում դեսպան Ա․Ղևոնդյանը ծանոթացել է Ղրղզստանում հավատարմագրված դիվանագիտական կորպուսի գործունեության առանձնահատկություններին և մոտակա ծրագրերին։

Նույն օրը «Արարատ» հասարակական կազմակերպության ղեկավարության և ակտիվի հետ կայացած հանդիպմանը դեսպան Ա․Ղևոնդյանը տեղեկացվել է Ղրղզստանում հայ համայնքի ձևավորման փուլերի և ընթացիկ ծրագրերի մասին։ Քննարկվել են նաև դեսպանություն և նշյալ համայնքային կառույցի փոխգործակցությանն առնչվող հարցեր։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր