Հանդիպում Ղազախստանի ազգային էկոնոմիկայի նախարարի հետ

06 սեպտեմբերի, 2023

Ս․թ․ սեպտեմբերի 6-ին կայացել է Ղազախստանում Հայաստանի դեսպան Արմեն Ղևոնդյանի հանդիպումը Ղազախստանի ազգային էկոնոմիկայի նախարար Ալիբեկ Կուանտիրովի հետ։

Հանդիպմանը քննարկվել են հայ-ղազախստանյան տնտեսական փոխգործակցության խթանմանն առնչվող հարցեր՝ նոր հեռանկարային ուղղությունների և նորարարության, ինչպես նաև պետություններում, այդ թվում` ազատ տնտեսական գոտիների շրջանակներում տրամադրվող արտոնությունների շեշտադրմամբ։ Նշյալ համատեքստում շոշափվել է փոխադարձ առևտրի առաջմղման թեման՝ ապրանքաբաշխիչ՝ նաև փոքր և միջին ձեռնարկատիրության ներուժը համալրող ցանցերի շահագործմամբ։

Փաստելով տնտեսական ուղղվածության տարբեր բազմակողմ հարթակներում մի շարք հարցերի շուրջ Հայաստանի և Ղազախստանի դիրքորոշումների համընկնումն ու համանմանությունը՝ հետաքրքրվածություն է արտահայտվել երկկողմ երկխոսության աշխուժացման հարցում՝ փորձի փոխանակման և փոխընդունելի քայլերի մշակման նպատակով։

Հանդիպմանը, որի ընթացքում ներկայացվել է Հայաստանում ներդրումային կլիմայի և ներդրումների պետական աջակցության միջոցների վերաբերյալ տեղեկատվությունը, պայմանավորվածություն է ձեռք բերվել աշխատանքային շփումների շարունակականության վերաբերյալ, այդ թվում՝ հայ-ղազախստանյան միջկառավարական հանձնաժողովի 9-րդ նիստի որոշումների ներքո։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր