Դեսպան Ա․Ղևոնդյանի հանդիպումը Ղազախստանի արտաքին քաղաքական գերատեսչությունում

19 սեպտեմբերի, 2023

Ս․թ․ սեպտեմբերի 19-ին կայացել է Ղազախստանում Հայաստանի դեսպան Արմեն Ղևոնդյանի հանդիպումը Ղազախստանի արտաքին գործերի նախարարի տեղակալ Ալիբեկ Բակաևի հետ։

Հանդիպման ընթացքում հանգամանալից մտքեր են փոխանակվել հայ-ղազախստանյան հարաբերությունների առկա վիճակի վերաբերյալ՝ քաղաքական, առևտրատնտեսական և հումանիտար ոլորտներում փոխգործակցության ամրապնդման շեշտադրմամբ։ Տնտեսական փոխկապակցվածության հարցերի քննարկման համատեքստում վերահաստատվել է Երևանի և Աստանայի հետաքրքրվածությունն ապրանքների մատակարարման նոր շղթաների ձևավորման, ինչպես նաև տրանսպորտային-լոգիստիկ երթուղիների դիվերսիֆիկացման, ներառյալ տրանսպորտային կապերի ապաշրջափակման և երկրների ինքնիշխանության և ազգային իրավազորության ներքո վերջիններիս հետագա գործունեության հարցում։

Դեսպան Ա․Ղևոնդյանի կողմից մանրամասն ներկայացվել է Լեռնային Ղարաբաղում էթնիկ զտումների իրականացմանը միտված Բաքվի կողմից վարվող քաղաքականության հետևանքով Լեռնային Ղարաբաղի ժողովրդի իրավունքների և անվտանգության մասով վատթարացող իրադրությունն, ինչպես նաև արտաքին սպառնալիքներն ու մարտահրավերները, որոնց առերեսվում է Հայաստանը։

Տարածաշրջանային անվտանգության և կայունության հարցերի դիտարկման համատեքստում երկուստեք կարևորվել է բոլոր մասնակիցների իրական հավատարմությունն առկա խնդիրները բացառապես քաղաքական-դիվանագիտական միջոցներով կարգավորման հարցում՝ ՄԱԿ Կանոնադրության և միջազգային իրավունքի սկզբունքների և նորմերի համաձայն։

Քննարկվել են նաև երկու պետությունների քաղաքացիների իրավունքների և շահերի պաշտպանմանը միտված հյուպատոսական ոլորտում ծավալվող փոխգործակցությանն առնչվող հարցեր։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր