Հայաստանի և Ղազախստանի խորհրդարանականների հանդիպման մասին

21 նոյեմբերի, 2023

Ս.թ. նոյեմբերի 20-ին Աստանայում Հայաստանի Ազգային ժողովի պատվիրակությունը անցկացրել է մի շարք հանդիպումներ՝ Ղազախստանի Հանրապետության խորհրդարանի Մաժլիսում և Սենատում:

Ազգային ժողովի «Հայաստան-Ղազախստան» Բարեկամության խմբի ղեկավար Վաղարշակ Հարությունյանի գլխավորած պատվիրակությունը Մաժլիսի միջազգային հարցերով, պաշտպանության և անվտանգության հանձնաժողովի նախագահ Այգուլ Կուսպանի և Մաժլիսի պատգամավորների հետ հանդիպման ընթացքում քննարկել է միջխորհրդարանական համագործակցությանն առնչվող հարցեր՝ միտված հայ-ղազախստանյան միջպետական հարաբերությունների ակտիվացմանն ու լրացուցիչ լիցք հաղորդելուն, ինչպես նաև վերջիններս նոր փոխշահավետ առևտրատնտեսական և հետաքրքրություն ներկայացնող մշակութային ծրագրերի համալրմամբ: Նշյալ, ինչպես նաև բարեկամության խմբերի, ազգային խորհրդարանների ոլորտային հանձնաժողովների և կոմիտեների շրջանակներում փոխգործակցության հարցերը դիտարկվել են նաև նույն օրը Ղազախստանի խորհրդարանի Սենատում ձևավորված Հայաստանի Հանրապետության հետ համագործակցության խմբի սենատոր Ն.Բ.Ժուսիպի գլխավորությամբ կայացած հանդիպմանը:

Հանդիպումների ընթացքում ղազախ խորհրդարանականները տեղեկացվել են Հարավային Կովկասում երկարաժամկետ խաղաղության ու կայունության հաստատմանն ուղղված Հայաստանի մոտեցումներին, ինչպես նաև Հայաստանի Կառավարության կողմից նախաձեռնած «Խաղաղության խաչմերուկ» կոնցեպտի հիմնական դրույթներին, որը միտված է այդ թվում՝ տարածաշրջանային հաղորդակցությունների ապաշրջափակմանն, ինչը կարող է էապես նպաստել տնտեսական և տարածաշրջանային կապերի զարգացմանը:

Իր հերթին, նշյալ հանդիպումներին Ղազախստանում Հայաստանի դեսպան Արմեն Ղևոնդյանն ընդգծել է փոխայցելությունների և միջխորհրդարանական երկխոսության ակտիվացման պահանջվածությունը՝ հօգուտ երկկողմ համագործակցությանն օրենսդրական աջակցության ապահովմանն ու բազմակողմ համապատասխան հարթակներում փոխգործակցության առաջմղման:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր