Հայաստանի դեսպանի հանդիպումը Ղազախստանի արտաքին քաղաքական գերատեսչության ղեկավարի տեղակալի հետ

01 դեկտեմբերի, 2023

Ս․թ․ դեկտեմբերի 1-ին Ղազախստանում Հայաստանի դեսպան Արմեն Ղևոնդյանը հանդիպել է Ղազախստանի Հանրապետության արտաքին գործերի նախարարի տեղակալ Երմուխամբետ Կոնուսպաևի հետ։

Հանդիպմանը քննարկվել են ինչպես երկկողմ ձևաչափում, այնպես էլ բազմակողմ հարթակներում հայ-ղազախստանյան համագործակցության զարգացմանն առնչվող հարցեր։ Այս համատեքստում երկուստեք ընդգծվել է 1999 թվականին Հայաստանի Հանրապետության և Ղազախստանի Հանրապետության միջև կնքված բարեկամության ու համագործակցության մասին պայմանագրի դրույթներին համահունչ համատեղ ջանքերի կարևորությունը, այդ թվում՝ փոխադարձ այցերի կազմակերպման միջոցով։

Դիտարկվել են նաև տարածաշրջանային անվտանգությանը և կայունությանը, տրանսպորտային կապուղիների ապաշրջափակմանն ու դիվերսիֆիկացմանն առնչվող հարցեր։ Դեսպան Ղևոնդյանը ներկայացրել է Հայաստանի կառավարության կողմից նախաձեռնած «Խաղաղության խաչմերուկ» նախագիծը, որի իրականացումը՝ Հարավային Կովկասում համապատասխան պայմանների առկայության պարագայում, երկրներին հնարավորություն կընձեռի ամրագրել փոխկապվածության նոր մակարդակ՝ ավելի լայն տարածաշրջանային կտրվածքով։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր