Ընդունելություն Աստանայում՝ նվիրված Բանակի օրվան

12 մարտի, 2024

2024թ․ մարտի 12-ին Աստանայում կազմակերպվել է Հայաստանի Հանրապետության զինված ուժերի կազմավորման 32-րդ տարեդարձին նվիրված ընդունելություն, որին մասնակցել են Ղազախստանի պաշտպանության նախարարության և Զինված ուժերի Գլխավոր շտաբի բարձրաստիճան ներկայացուցիչներ, Ղազախստանում հավատարմագրված ռազմական կցորդներ և ռազմադիվանագիտական անձնակազմի ներկայացուցիչներ, ինչպես նաև հասարակական գործիչներ և հայ համայնքի ներկայացուցիչներ։

Ողջունի իր խոսքում Ղազախստանում Հայաստանի ռազմական կցորդ, գնդապետ Գրիգոր Տոնաբեկյանն անդրադարձել է Հայաստանի Հանրապետության զինված ուժերի ձևավորման ուղուն, որն անքակտելիորեն միահյուսված է Հայաստանի պետականության վերականգնման հետ։ Ընդգծվել է, որ այսօր էլ ՀՀ Զինված ուժերը՝ հանդիսանալով Հայաստանի անկախության գլխավոր երաշխավոր և դիմակայելով անվտանգային մարտահրավերներին, շարունակում են անցնել բարեփոխումների ճանապարհով։ Երկրի պաշտպանական կարողությունների ամրապնդման ու բանակի արդիականացման համատեքստում կարևորվել է միջազգային համագործակցությունն, ինչը ՀՀ Զինված ուժերին հնարավորություն է ընձեռում ավելի արդյունավետ իրականացնել ստանձնած կարևորագույն առաքելությունը։

Ղազախստանի Զինված Ուժերի Գլխավոր շտաբի պետի առաջին տեղակալ, ավիացիայի գեներալ-լեյտենանտ Նուրլան Կարբենովն իր խոսքում նշել է, որ Ղազախստանի և Հայաստանի միջև երկկողմ համագործակցությունը զարգանում է գործընկերության և փոխադարձ շահավետության ոգով։ Նշվել է նաև, որ համակողմանի փոխգործակցության ֆոնին ռազմական համագործակցությունն իր ուրույն տեղն է գրավում երկկողմ միջպետական օրակարգում՝ կրելով պլանային բնույթ, այդ թվում՝ պաշտպանության նախարարությունների և գլխավոր շտաբների ղեկավարության կանոնավոր հանդիպումների ու միջգերատեսչական խորհրդատվությունների և այլ միջոցառումների միջոցով։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր