Հայ-ղազախական միջկառավարական հանձնաժողովի նիստի վերաբերյալ

03 ապրիլի, 2024

Ս․թ․ ապրիլի 2-ին Հայաստանի Հանրապետության փոխվարչապետ Մ․Գրիգորյանի և Ղազախստանի Հանրապետության փոխվարչապետ Ս․Ժումանգարինի համանախագահությամբ կայացել է Տնտեսական համագործակցության հարցերով հայ-ղազախական միջկառավարական հանձնաժողովի 10-րդ նիստը:

Տեսակապի ձևաչափով կայացած քննարկումների ընթացքում դիտարկվել է հանձնաժողովի նախորդ նիստի որոշումների իրագործման ընթացքը, նախանշվել են տնտեսական փոխգործակցության բազմաբնույթ օրակարգի ուրվագծերը՝ միտված նոր հեռանկարային ուղղությունների բացահայտմանը և փոխշահավետ նախագծերի, այդ թվում՝ տրանսպորտային-լոգիստիկ ոլորտում, իրագործման միջոցով երկու պետությունների միջև համագործակցության առաջմղմանը։

Հայաստանի փոխվարչապետը նշել է, որ «Մեր նպատակն է հայ-ղազախական գործակցությունն էլ ավելի դինամիկ, արդյունավետ և փոխշահավետ դարձնել՝ ի շահ մեր երկրների և մեր քաղաքացիների։ Մենք մտադիր ենք զարգացնել առևտրատնտեսական համագործակցությունը, խթանել ներդրումները, ապահովել դրանց պաշտպանությունը, զարգացնել ենթակառուցվածքային կապերն ու առևտուրը»։ Տրանսպորտային կապակցվածության և տարանցիկ ներուժի ամրապնդման համատեքստում Մ․Գրիգորյանն ընդգծել է տրանսպորտային երթուղիների դիվերսիֆիկացմանն ու լոգիստիկ ենթակառուցվածքների հնարավորությունների ընդլայնմանն ուղղված՝ Հայաստանի Կառավարության կողմից նախաձեռնած «Խաղաղության խաչմերուկ» նախագծի տարածաշրջանային նշանակությունը։

Իր հերթին՝ Ղազախստանի վարչապետի տեղակալ Ս․Ժումանգարինը՝ ուշադրությունը սևեռելով Ղազախստանում ձևավորված ներդրումային կլիմայի և ներմուծման-արտահանման գործարքների աջակցման առկա գործիքակազմին՝ վերահաստատել է պատրաստակամությունը Հայաստանի հետ երկկողմ կոոպերացիոն նախագծերի շրջանակներում երկարաժամկետ համագործակցության մասով, որը շահեկան կլինի նաև երրորդ երկրների շուկաներ մուտք գործելու տեսանկյունից։

Նիստին առանձնահատուկ կարևորվել է լոգիստիկայի ոլորտում գործնական փոխգործակցությունն, ինչպես նաև երկու պետությունների մայրաքաղաքների միջև ուղիղ օդային հաղորդակցության իրականացումը՝ հետագայում թռիչքների աշխարհագրության ընդլայնման և չվերթների քանակի աճի ընկալմամբ։

Քննարկումների արդյունքներով ընդունվել է միջկառավարական հանձնաժողովի նիստի արձանագրությունը։

Միջկառավարական հանձնաժողովի նիստի վերաբերյալ նյութերը հասանելի են հետևյալ հղումներով՝

https://www.gov.am/am/news/item/15848/

https://primeminister.kz/ru/news/serik-zhumangarin-priglasil-investorov-iz-armenii-k-realizatsii-sovmestnykh-proektov-27775

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր