Երևանում քննարկվել են հայ-ղազախստանյան տնտեսական համագործակցության հեռանկարները

09 ապրիլի, 2024

Ս․թ․ ապրիլի 8-ին Հայաստանի փոխվարչապետ Մհեր Գրիգորյանն ընդունել է Երևան ժամանած Ղազախստանի առևտրի և ինտեգրման նախարար Արման Շակկալիևին։Կայացած քննարկումների ընթացքում, որոնց մասնակցել են նաև Հայաստանի և Ղազախստանի դիվանագիտական առաքելությունների ղեկավարներ, դեսպաններ՝ համապատասխանաբար Արմեն Ղևոնդյանն ու Բոլատ Իմանբաևը, դիտարկվել են հայ-ղազախստանյան առևտրատնտեսական համագործակցության ընթացիկ փուլն/արդի իրադրությունն ու հետագա զարգացման հեռանկարները։ Գոհունակությամբ արձանագրելով տնտեսական փոխգործակցության աճի դիտվող միտումը՝ երկուստեք հաստատվել է փոխադարձ մատակարարվող ապրանքների և ծառայությունների ծավալների ու անվանացանկի ընդլայնմանը միտված քայլերի ձեռնարկման մասով պատրաստակամությունը։

Նույն օրը կայացել է Հայաստանի էկոնոմիկայի նախարար Գևորգ Պապոյանի հանդիպումը նախարար Արման Շակկալիևի հետ։ Հանդիպմանը վերահաստատվել է ս․թ․ ապրիլի 2-ին կայացած տնտեսական համագործակցության հայ-ղազախստանյան միջկառավարական հանձնաժողովի հերթական նիստի որոշումների իրագործման կարևորությունն, ինչպես նաև մատակարարումների նոր շղթաների կառուցման ուղղությամբ փոխգործակցության ակտիվացումը՝ տրանսպորտային-լոգիստիկ կապուղիների և հնարավորությունների ավելի լայն գործարկման շեշտադրմամբ։

Երկու պետությունների պետական կառույցների և տնտեսվարող սուբյեկտների միջև անխափան երկխոսության և հետադարձ կապի ապահովման համատեքստում նշվել է ս․թ․ ապրիլի 9-ին «Առևտրատնտեսական հարաբերությունների, զբոսաշրջության և լոգիստիկայի զարգացում» թեմայով Երևանում նախատեսված գործարար համաժողովի պահանջվածությունը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր