Երևանում կայացել է հայ-ղազախստանյան կլոր սեղան

03 մայիսի, 2024

Ս․թ․ մայիսի 3-ին Երևանում կայացել է «Հայաստան-Ղազախստան․ նոր մոտեցումներ, նոր համագործակցություն» խորագրով կլոր սեղանը, որին մասնակցել են երկու երկրների փորձագիտական և գիտակրթական համայնքի ներկայացուցիչները։

Ազգային դիմակայության և պետական կառավարման հայկական ինստիտուտի (INFORS Armenia) կողմից Ղազախստանի Հանրապետության նախագահին առընթեր Ռազմավարական հետազոտությունների ղազախստանյան ինստիտուտի (KISI) հետ գործակցաբար կազմակերպած միջոցառման մասնակիցներին ողջույնի խոսքով են դիմել Ղազախստանում Հայաստանի և Հայաստանում Ղազախստանի դիվանագիտական առաքելությունների ղեկավարներ Արմեն Ղևոնդյանը և Բոլատ Իմանբաևը։

Դեսպան Ա․Ղևոնդյանն իր տեսաուղերձում ուշադրությունը սևեռել է հայ-ղազախստանյան միջպետական համագործակցության զարգացման մասով փորձագիտական-վերլուծական հետազոտությունների և առաջարկների կարևորության վրա, որոնց պահանջվածությունն էլ ավելի է արդիականացել Ղազախստանի Հանրապետության նախագահ Կ․Տոկաևի՝ Հայաստանի Հանրապետություն կատարած պաշտոնական այցի արդյունքների ներքո։

Կլոր սեղանի շրջանակներում INFORS Armenia-ի հիմնադիր Գ․Մելիքյաբի և KISI-ի ղեկավար Ե․Տուկումովի կողմից ստորագրվել է նշյալ կառույցների միջև Համագործակցության հուշագիր։ Հաջորդած քննարկումների ու բանավեճի ընթացքում մտքեր են փոխանակվել հարցերի լայն շրջանակով՝ միտված փորձագիտական, վերլուծական և գիտական շրջանակների, ինչպես նաև Հայաստանի և Ղազախստանի ոլորտային գիտահետազոտական կառույցների միջև համագործակցության հեռանկարային ուղղությունների վերհանմանը՝ երկու պետությունների միջև փոխհարաբերությունների արդյունավետ տեղեկատվական-վերլուծական ուղեկցման ապահովման շեշտադրմամբ։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր