Հայաստանի արտաքին գործերի նախարարի հանդիպումը Ղազախստանի նախագահի հետ

02 ապրիլի, 2025

2025թ․ մարտի 27-ին Ղազախստանի Հանրապետությունում պաշտոնական այցով գտնվող Հայաստանի Հանրապետության արտաքին գործերի նախարար Արարատ Միրզոյանին ընդունել է Ղազախստանի Հանրապետության նախագահ Կասիմ-Ժոմարտ Տոկաևը։

Ողջունելով Հայաստանի արտաքին քաղաքական գերատեսչության ղեկավարին Ակորդայում՝ Ղազախստանի նախագահ Կ․Տոկաևը մասնավորապես նշել է հետևյալը․ «Ձեր առաջին պաշտոնական այցն Աստանա կարևոր նշանակություն ունի մեր գործընկերության առաջմղման տեսակետից։ Մենք մեծ ակնածանք ենք տածում հայ ժողովրդի ու Ձեր պետության նկատմամբ»։

Հանդիպման ընթացքում քննարկվել են Հայաստանի և Ղազախստանի միջև երկկողմ հարաբերությունների օրակարգի առանցքային հարցեր։ Երկուստեք գոհունակությամբ արձանագրվել է ամենաբարձր մակարդակում վերջին ժամանակաշրջանում քաղաքական երկխոսության մասով նախանշված ակտիվ դինամիկան։ Արձանագրելով ձեռք բերված պայմանավորվածությունների, ինչպես նաև տնտեսության, առևտրի, տրանսպորտի, նորարարությունների և կրթության ոլորտներում համատեղ նախագծերի իրականացման կարևորությունը՝ հանդիպմանը մտքեր են փոխանակվել երկու երկրների միջև ռազմավարական բնույթի գործընկերության զարգացման և փոխադարձ հետաքրքրություն ներկայացնող ոլորտներում համագործակցության հետագա ընդլայնման ուղղությամբ իրականացվող աշխատանքների շուրջ։

Տնտեսական զարգացման և փոխկապակցվածության ապահովման համատեքստում արձանագրվել է տրանսպորտային-լոգիստիկ երթուղիների արդյունավետ օգտագործմանն ու բեռնափոխադրումների ծավալի աճին միտված ջանքերի կարևորությունը։

Մտքեր են փոխանակել նաև միջազգային ու տարածաշրջանային բնույթի հարցերի շուրջ։

Նախարար Ա․Միրզոյանը բարձր է գնահատել Ղազախստանի դիրքորոշումը Հայաստանի և Ադրբեջանի միջև հարաբերությունների կարգավորման գործընթացի առաջմղման, մասնավորապես խաղաղության պայմանագրի ստորագրման հարցում։ Այս կապակցությամբ ևս մեկ անգամ վերահաստատվել է Հայաստանի պատրաստակամությունը նշյալ համաձայնագրի ստորագրման մասով։

Իր հերթին՝ նախագահ Կ․Տոկաևը նշել է, որ Ղազախստանը ողջունում է Երևանի և Բաքվի միջև խաղաղության և միջպետական հարաբերությունների հաստատման մասին համաձայնագրի նախագծի տեքստի համաձայնեցման շուրջ բանակցությունների ավարտը։ Կարծիք է հայտնել, որ վերջինիս ընդունումը կհանդիսանա Հայաստանի և Ադրբեջանի միջև խաղաղության հաստատման նախանշան ու կնպաստի տարածաշրջանի անվտանգության ամրապնդման և համագործակցության զարգացմանն ինչպես Ղազախստանի, այնպես էլ Կենտրոնական Ասիայի բոլոր երկրների հետ։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր