Դեսպան Ղևոնդյանը մի շարք հանդիպումներ է ունեցել Տաջիկստանի արտաքին քաղաքական գերատեսչությունում

21 ապրիլի, 2025

2025 թվականի ապրիլի 21-ին համատեղության կարգով (նստավայրը՝ Աստանա) Տաջիկստանում Հայաստանի դեսպան Արմեն Ղևոնդյանը Դուշանբեում հանդիպումներ է ունեցել Տաջիկստանի Հանրապետության արտաքին գործերի նախարարության մի շարք ոլորտային ստորաբաժանումների ղեկավարների հետ։

ԱՊՀ երկրների վարչության պետ Շարաֆ Ռահիմիի հետ կայացած հանդիպմանը հանգամանալից քննարկվել են քաղաքական, տնտեսական, մշակութային, հումանիտար և այլ ոլորտներում հայ-տաջիկական համագործակցության հետագա զարգացմանն առնչվող հարցեր։ Մտքեր են փոխանակվել տեսանելի ապագայում ծրագրվող համատեղ միջոցառումների ժամանակացույցի վերաբերյալ, այդ թվում՝ տնտեսական համագործակցության հարցերով երկկողմ միջկառավարական հանձնաժողովի և ազգային խորհրդարաններում ձևավորված բարեկամության խմբերի գծով, ինչպես նաև ԱՊՀ-ում Տաջիկստանի Հանրապետության նախագահության շրջանակներում։ Առևտրատնտեսական համագործակցության խթանման համատեքստում քննարկվել է տրանսպորտային և լոգիստիկ երթուղիների դիվերսիֆիկացման թեման, ինչը հնարավորություն կընձեռի ապահովել երկկողմ արտահանման-ներմուծման գործառնությունների ազատականացումն ու ընդլայնել երկրների տարանցիկ ներուժը։

ՄԱԿ, միջազգային և տարածաշրջանային կազմակերպությունների հարթակներում Հայաստանի և Տաջիկստանի փոխգործակցության հարցերը քննարկվել են Միջազգային կազմակերպությունների վարչության ղեկավար Ջամշեդ Խոմիձոդայի հետ կայացած հանդիպման ընթացքում։ Նշվել է փոխադարձ հետաքրքրություն ներկայացնող հարցերի շուրջ հետագա համագործակցության ակտիվացման պահանջվածությունն, այդ թվում՝ միջԱԳՆական թեմատիկ խորհրդակցությունների կազմակերպման միջոցով։

Իրավապայմանագրային վարչության ղեկավարության հետ նախաձեռնած հանդիպմանն ուշադրություն է դարձվել երկկողմ իրավապայմանագրային դաշտի կատարելագործմանն ու ընդլայնմանը միտված աշխատանքների կարևորությանը։

Դեսպան Ա․Ղևոնդյանն առանձին հանդիպում է ունեցել նաև Պետական արարողակարգի ղեկավար Միզրոբիդդին Սաֆրազոդայի հետ:

Քննարկումների արդյունքում վերահաստատվել է սերտ համագործակցության փոխադարձ պատրաստակամությունը՝ ի շահ Հայաստանի և Տաջիկստանի միջև արտաքին քաղաքական փոխգործակցության ոլորտում համագործակցության խորացման:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր