Ալեն Սիմոնյանն ընդունել է Ղրղզստանի խորհրդարանի նախագահի գլխավորած պատվիրակությանը

31 մայիսի, 2025

2025թ. մայիսի 26-ին Հայաստանի Հանրապետության Ազգային Ժողովի նախագահ Ալեն Սիմոնյանը ընդունել է Ղրղզական Հանրապետության Ժոգորկու Քենեշի տորագա (խորհրդարանի նախագահ) Նուրլանբեկ Տուրգունբեկ ուուլուին:

Հայաստանի Ազգային Ժողովում ողջունելով իր ղրղրզստանյան գործընկերոջը, նախագահ Ալեն Սիմոնյանը վստահություն է հայտնել, որ Ժոգորկու Քենեշի տորագայի պաշտոնական այցը նոր լիցք կհաղորդի երկու երկրների հարաբերություններին: Տորագա Նուրլանբեկ Տուրգունբեկ ուուլուն իր հերթին ընդգծել է Ղրղզստանի հետաքրքրվածությունը Հայաստանի հետ գործընկերության և փոխհարաբերությունների զարգացման հարցում՝ ինչպես երկկողմ մակարդակում, այնպես էլ միջազգային կազմակերպությունների և միավորումների շրջանակներում:

Դեմ առ դեմ ձևաչափով և պատվիրակությունների մասնակցությամբ անցկացված հանդիպումների ընթացքում քննարկվել են Հայաստանի և Ղրղզստանի միջև փոխգործակցության արդի հարցեր: Հատուկ ուշադրություն է դարձվել միջխորհրդարանական փոխգործակցության ակտիվացման հարցերին, այդ թվում երկու երկրների օրենսդիր մարմիններում գործող բարեկամական խմբերի և ոլորտային հանձնաժողովների շրջանակներում՝ ի շահ քաղաքական, տնտեսական և մշակութային-հումանիտար ոլորտներում երկկողմ համագործակցության առաջմղման:

Տարածաշրջանային հարցերի դիտարկման ընթացքում Ազգային Ժողովի նախագահը կարևորել է Հայաստանի կառավարության նախաձեռնած՝ «Խաղաղության խաչմերուկ» նախագծի իրագործումը, որը հնարավորություն կընձեռի էականորեն ընդլայնել տրանսպորտային լոգիստիկ կապերն, այդ թվում Հայաստանի և Ղրղզստանի միջև: ԱԺ նախագահ Ա.Սիմոնյանը նաև վերահաստատել է Հայաստանի և Ադրբեջանի միջև խաղաղության համաձայնագրի՝ արդեն համաձայնեցված նախագիծը ստորագրելու մասով հայաստանյան կողմի պատրաստակամությունը: Այդ համատեքստում Ժոգորկու Քենեշի տորագան նշել է, որ ղրղզստանյան կողմն աջակցություն է հայտնում խաղաղության նշյալ համաձայնագրի ստորագրմանը միտված ջանքերին և պատրաստ է հարթակ տրամադրել վերջինիս ստորագրման համար:

Հանդիպման ավարտին երկու երկրների խորհրդարանների նախագահները ստորագրել են «Հայաստանի Հանրապետության Ազգային ժողովի և Ղրղզական Հանրապետության Ժոգորկու Քենեշի միջև համագործակցության մասին» հուշագիրը, որով նախատեսվում է ակտիվացնել երկու երկրների խորհրդարանների բարեկամական խմբերի, հանձնաժողովների և աշխատակազմերի միջև համագործակցությունը:

Ստորագրման արարողության շրջանակներում Հայաստանի Ազգային Ժողովի պատգամավոր, Հայաստան-Ղրղզստան բարեկամական խմբի ղեկավար Ալեքսեյ Սանդիկովը պարգևատրվել է Ղրղզական Հանրապետության Ժոգորկու Քենեշի պատվոգրով՝ «ղրղզ-հայկական միջխորհրդարանական համագործակցության ամրապնդման համար»։

Մանրամասները՝ տեսանյութում:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր