Հայաստանի նախագահը ընդունել է Ղրղզստանի խորհրդարանի նախագահին

31 մայիսի, 2025

2025թ. մայիսի 26-ին Հայաստանի Հանրապետության նախագահ Վահագն Խաչատուրյանն ընդունել է Ղրղզական Հանրապետության Ժոգորկու Քենեշի տորագա (խորհրդարանի նախագահ) Նուրլանբեկ Տուրգունբեկ ուուլուին:

Ողջունելով ղրղզստանյան պատվիրակությանը Հայաստանում՝ նախագահ Վ.Խաչատուրյանը հույս է հայտնել, որ Ժոգորկու Քենեշի տորագայի պաշտոնական այցը լրացուցիչ լիցք կհաղորդի Երևանի և Բիշքեկի երկկողմ հարաբերությունների հետագա ամրապնդմանը:

Շնորհակալություն հայտնելով ջերմ ընդունելության համար և ընդգծելով որ Ղրղզստանը մեծ նշանակություն է տալիս Հայաստանի հետ համագործակցությանը, տորագա Ն.Տուրգունբեկ ուուլուն նշել է. «Երկու պետությունների միջև առկա է կառուցողական քաղաքական երկխոսություն, ձևավորված է անհրաժեշտ իրավապայմանագրային հենք: Մենք հետաքրքրված ենք հետագա ակտիվ համագործակցության հարցում՝ ինչպես երկկողմ ձևաչափում, այնպես էլ միջազգային հարթակների և ինտեգրացիոն միավորումների շրջանակներում»:

Երկու երկրների միջև բարեկամական հարաբերությունների զարգացման համատեքստում հաջորդիվ զրույցի ընթացքում ընդգծվել է միջխորհրդարանական համագործակցության առանցքային նշանակությունը: Առանձնահատուկ ուշադրություն է դարձվել խորհրդարանական դիվանագիտության զարգացմանն, ինչպես նաև օրենսդիր մարմինների միջև փորձի փոխանակման և փոխադարձ այցերի կազմակերպման հարցերին:

Հանդիպման ընթացքում քննարկվել են Ղրղզստանի հետ Հայաստանի համագործակցության խորացման հեռանկարները՝ հիմնված փոխադարձ վստահության և փոխշահավետ համագործակցության վրա: Արծարծվել են նաև տարածաշրջանային և միջազգային օրակարգի մի շարք արդի հարցեր: Այդ համատեքստում երկուստեք ընդգծվել է կառուցողական երկխոսության, միջազգային իրավունքի սկզբունքների պահպանման և խաղաղ կարգավորման մեխանիզմների կիրառման դերը՝ որպես կայունության և հարատև խաղաղության հասնելու առանցքային պայման:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր