Աստանայում քննարկվել են Հայաստանի և Ղազախստանի միջև առևտրատնտեսական համագործակցության ընդլայնման հեռանկարները

02 հունիսի, 2025

2025թ․ մայիսի 29-ին Ղազախստանի մայրաքաղաքում անցկացվող «Աստանա» միջազգային համաժողովի շրջանակներում Հայաստանի Հանրապետության էկոնոմիկայի նախարար Գևորգ Պապոյանը հանդիպել է Ղազախստանի Հանրապետության առևտրի և ինտեգրման նախարար Արման Շակկալիևի հետ։

Կառուցողական երկխոսության մթնոլորտում կայացած հանդիպմանը նախարար Գ․Պապոյանն ընդգծել է Կենտրոնական Ասիայում Հայաստանի համար հուսալի և հեռանկարային գործընկերոջ՝ Ղազախստանի հետ տնտեսական համագործակցության ընդլայնման կարևորությունն, ինչը կարող է էական ներդրում ունենալ ամբողջ եվրասիական տարածքի կայունության և բարեկեցության ամրապնդման գործում։

Իր հերթին նախարար Ա․Շակկալիևն ընդգծել է, որ Ղազախստանի համար Հայաստանը ոչ միայն տնտեսական գործընկեր է, այլ նաև մտերիմ, հուսալի դաշնակից, որի հետ հարաբերությունները ձևավորված են վստահության և փոխադարձ հարգանքի վրա։

Մտքերի փոխանակման ընթացքում երկուստեք արձանագրվել է, որ ներկայիս իրողությունները նաև նոր հնարավորություններ են ընձեռում փոխադարձ առևտրի, արդյունաբերական համագործակցության և ներդրումների ընդլայնման համար։ Այս համատեքստում Հայաստանի էկոնոմիկայի նախարարը մասնավորապես առանձնանշել է թանկարժեք քարերի և մետաղների արտահանման, ինչպես նաև դեղագործության բնագավառները։ Վերահաստատվել է նաև հայաստանյան կողմի հետաքրքրվածությունը ինչպես հայկական ագրոարդյունաբերական համալիրի արտադրանքի արտահանման ավելացման, այնպես էլ տոհմային կենդանիների ներմուծման հարցերում։

Հանդիպման ընթացքում նախարար Գ․Պապոյանը ներկայացրել է նաև Հայաստանի բարենպաստ ներդրումային և գործարար միջավայրն, ինչպես նաև պաշտոնական Երևանի կողմից նախաձեռնած «Խաղաղության խաչմերուկ» նախագիծը, որի շրջանակներում Հայաստանը կարող է դիտարկվել որպես կայուն փոխգործակցությունը միավորող հարթակ։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր