Դեսպան Ղևոնդյանը հանդիպում է ունեցել Տաջիկստանի տրանսպորտի նախարարի հետ

04 հունիսի, 2025

2025 թվականի հունիսի 3-ին Տաջիկստանում Հայաստանի դեսպան (նստավայրը՝ Աստանա) Արմեն Ղևոնդյանը Դուշանբեում հանդիպում է ունեցել Տաջիկստանի Հանրապետության տրանսպորտի նախարար Ազիմ Իբրոհիմի հետ։

Հանդիպմանը քննարկվել են տրանսպորտի ոլորտում Հայաստանի և Տաջիկստանի միջև փոխգործակցության առաջմղմանն առնչվող հարցեր:

Տրանսպորտի նախարար Ա.Իբրոհիմը դեսպան Ա.Ղևոնդյանին ծանոթացրել է Տաջիկստանի տրանսպորտային և լոգիստիկ հնարավորություններին, որոնք կարող են պահանջված լինել ինչպես երկկողմ առևտրատնտեսական հարաբերություններում, այնպես էլ տարանցիկ մուլտիմոդալ փոխադրումների կազմակերպման տեսանկյունից:

Առևտրատնտեսական համագործակցության ընդլայնման համատեքստում շեշտադրվել է Հայաստանի և Տաջիկստանի միջև օպտիմալ երթուղիների և փոխադարձ մատակարարման շղթաների մշակման կարևրությունը:

Հայաստանի կառավարության նախաձեռնած՝ «Խաղաղության խաչմերուկ» նախագծի դիտարկման համնատեքստում երկուստեք արձանագրվել է այն, որ նախագծի արդյունավետ իրագործումը կարող է նոր հնարավորություններ ընձեռնել ինչպես երկկողմ հարաբերությունների, այնպես էլ լայն տարածաշրջանային համագործակցության համար:

Հանդիպման արդյունքներով վերահաստատվել է պատրաստակամությունը շարունակել անհրաժեշտ ջանքերն՝ ընդլայնելու տրանսպորտային լոգիստիկ ոլորտում համագործակցությունն՝ ի շահ Հայաստանի և Տաջիկստանի միջև փոխշահավետ առևտրա-տնտեսական համագործակցության ներուժի բացահայտման:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր