Ալեն Սիմոնյանը հանդիպել է Ադիլբեկ Կասիմալիևի հետ

08 սեպտեմբերի, 2025

Ղրղզական Հանրապետությունում պաշտոնական այցով գտնվող՝ Հայաստանի Հանրապետության Ազգային Ժողովի նախագահ Ալեն Սիմոնյանը 2025թ․ սեպտեմբերի 4-ին Բիշքեկում հանդիպել է Ղրղզական Հանրապետության Նախարարների Կաբինետի նախագահ – Ղրղզական Հանրապետության նախագահի աշխատակազմի ղեկավար Ադիլբեկ Կասիմալիևի հետ։

Ողջունելով Հայաստանի խորհրդարանի ղեկավարին՝ Ղրղզստանի վարչապետը նշել է, որ Բիշքեկը կարևորում է Երևանի հետ համագործակցությունը՝ հիմնված է երկու երկրների ժողովուրդների միջև պատմականորեն ձևավորված բարեկամական հարաբերությունների վրա։

Առևտրատնտեսական և մշակութային-հումանիտար ոլորտներում երկկողմ համագործակցության արդի հարցերի դիտարկման ընթացքում Ա․Կասիմալիևն ընդգծել է որակապես նոր մակարդակում փոխգործակցության ներուժի իրացման պահանջարկը։ Այս համատեքստում նշվել է Տնտեսական համագործակցության հայ-ղրղզական միջկառավարական հանձնաժողովի դերակատարությունը, որի հերթական նիստի նախատեսվում է 2026թ․ սկզբին Բիշքեկում։

Իր հերթին՝ Ազգային Ժողովի նախագահ Ա․Սիմոնյանը վերահաստատել է Հայաստանի հանձնառությունը Ղրղզստանի հետ տարատեսակ ոլորտներում համագործակցության հետագա զարգացման և խորացման մասով։ Ա․Սիմոնյանը նաև կարևորել է երկու երկրների միջև ուղիղ օդային հաղորդակցման հաստատումը, զբոսաշրջության, նորարարության և տեխնոլոգիաների բնագավառում համագործակցության ներուժի զարգացումը, Ղրղզստանում Հայաստանի և Հայաստանում Ղրղզստանի մշակույթային օրերի կազմակերպումը։

Նախագահ Ա․Սիմոնյանը ներկայացրել է Հայաստանի և Ադրբեջանի միջև հարաբերությունների կարգավորման գործընթացի ներքո ձեռք բերված պայմանավորվածությունները։ Ընդգծելով Հարավային Կովկասում ամուր խաղաղության հասնելու մասով Հայաստանի հաստատակամությունը՝ Ա․Սիմոնյանը ներկայացրել է տարածաշրջանային կոմունիկացիաների ապաշրջափակման համատեքստում ընձեռվող հնարավորությունները։

Հանդիպման ընթացքում երկուստեք պատրաստակամություն է հայտնվել փոխադարձ հետաքրքրություն ներկայացնող բոլոր ուղղություններով փոխգործակցության ամրապնդման շուրջ։

Հանդիպման մասին տեսանյութը հասանելի է հետևյալ հղումով։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր