Հայկական խոհանոցի օրեր Աստանայում

18 սեպտեմբերի, 2026

Մշակութային դիվանագիտության առաջմղման շրջանակներում 2026 թվականի սեպտեմբերի 15-ից Աստանայում մեկնարկել են Հայկական խոհանոցի օրերը:
«The Ritz-Carlton Astana» հյուրանոցի կողմից կազմակերպված միջոցառումն միտված է Հայաստանի հարուստ գաստրոնոմիկ ժառանգության, ավանդույթների և զբոսաշրջային ներուժի հանրայնացմանը:
Հայաստանից հրավիրված շեֆ-խոհարար Արա Վանյանը («Armenia Marriott Hotel Yerevan») ներկայացրել է հատուկ ճաշացանկ, որում ընդգրկված են հայկական ազգային խոհանոցի հայտնի գլուխգործոցները՝ ժամանակակից մեկնաբանությամբ: Շնորհանդեսն ուղեկցվել է հայկական հանրահայտ գինիների և կոնյակների համտեսմամբ:
Ողջունելով միջոցառման հյուրերին՝ Ղազախստանում Հայաստանի դեսպան Արմեն Ղևոնդյանն ընդգծել է խոհարարական ավանդույթների պահպանման և զարգացման կարևորությունը, որոնք հայ ժողովրդի ինքնության և պատմության անբաժանելի մաս են: «Այսօր յուրահատուկ հնարավորություն կա ներկայացնելու ոչ միայն ավանդական ճաշատեսակներ, այլև հայկական հյուրընկալության դարավոր մշակույթը: Ակնհայտ է, որ նման միջոցառումները շատերին կոգեշնչեն ավելի մոտիկից ծանոթանալ Հայաստանին և անձամբ այցելել մեր երկիր», - նշել է Հայաստանի դիվանագիտական առաքելության ղեկավարը:
«The Ritz-Carlton Astana» հյուրանոցում Հայկական խոհանոցի օրերը կտևեն մինչ սեպտեմբերի 20-ը: Այս ընթացքում Ղազախստանի մայրաքաղաքի բնակիչներն ու հյուրերը՝ շեֆ-խոհարարի հատուկ սեթ-մենյուի շրջանակներում, հնարավորություն կունենան համտեսել հայկական ինքնատիպ ճաշատեսակներ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր